يا عم انتا تعرفني ؟؟ ايوة تعرف حياتي عاملة إزاي ؟؟
تعرف إني كنت في مسيرة دار القضاء 2003 مع جورج إسحق ؟؟ و خلصنا و اتلمينا كلنا .. و كنت معاه في 2004 بس مبقيناش بنتلم :) بقينا بنطلع من نفسنا عالبوكس
2005 كنا مع أيمن نوور .. قلت يسقط مبارك .. بس محدش سمعني .. كان صوتي واطي ؟؟ ولا الناس مكنتش بتسمع
قلت لأ لتعديل الدستور .. و عسكري ضربني بشومة علي دماغي .. و لقيت واحد من بتوع المطافي إبتسملي .. و فتح المياة في وشي :)
و كنت جعان قبل كده فكلت من الأوبن بوفيه :) الزبالة :)
كنت علي بورش برج العرب مع باسم فتحي .. كتبت رسالة زي اللي كتبها بالظبط :)
كنت بعمل مظاهرات في الجامعة كتير جدا :) و بسقط في انتخابات إتحاد الطلاب بالتزوير .. و مت قبل كده في حضن ابويا علي فكرة :) و نزلت في مظاهرة كبيرة و رفعت صورتي و عيطت عليا و قلت ربنا ياخدكو يا صهاينة يا ولاد الكلب
و كنت قاعد في السايبر و جم اتنين يفتشوني و مرضتش :) و موتووني .. بعد ماموتووني كنت همووت :'( .. و شفتني و انا بقول عليا في يوم من الايام ده عيل حشاش مايستاهلش .. و عيطت اكتر اني قلت كده .. شفتني و زهرة بتعيط عليا .. شفت امي صحيت مخضوضة و بتشوفني في سريري ملقتنييش :) مش عارف هي كان في دماغها إيه ساعتها .. يمكن كانت فكراني ماموتش .. يمكن كانت حاسة ان ده كابوس و هتصحي تلاقيني لسه ماجتش :)
و يوم كنت رايح الصعيد و مكنش معايا فلوس .. ركبت قطر عادي :) .. وعلي اخر الرحلة بقيت وجبة كباب .. قالولي ان كانت ريحتي حلوة و انا متفحم و يأست من دي بلد و هربت .. بس مت تاني في العبارة .. كنت بصرخ و بقول حد ينقذني .. مبعرفش اعوووم .. قعدت اموت في ربع ساعة .. قلت يا رب مد إيدك انقذني .. و دموعي اللي نزلت ساعتها كانت ممكن تغرقني اصلا :)
ساعتها أهلي نسيو يدفنوا جثتي :) .. كانو بيتفرجو علي ماتش مصر و كوت ديفوار :)
بس انا مسكتش .. و عملت مظاهرات عن كل ده
و قبض عليا هشام العراقي .. و كلني بالأقلام .. و كنت عايز اعيط بس قلت مش هضعف قدامه .. بس عيطت .. صعبت عليا نفسي .. بس هو كان فرحان .. و وداني للكومي و سامي سيدهم .. و عسكري اتحرش بيا جنسيا .. عسكري من اللي بنزل عشان اشوفهم في يوم عايشين عيشة آدمية :)
و كنت بلم زبالة و بأكلها للخنازير قبل كده :) .. بس قطعو عييشي .. اخترعو مرض مخصوص عشان يضرووني
و كنت قاعد في إجتماع قبل كده و خدنا قرار اننا مش هننزل انتخابات مجلس شعب 2010 .. بس احمد عز كان مراقبني .. و أول مامشيت من الإجتماع كلم كل اللي كنت معاهم و وعدهم بكراسي و كلهم نزلو الانتخابات .. و كنت براقب عالأنتخابات .. و خدت مطوة في وشي :) و كلهم انسحبو من الانتخابات أخر النهار :) .. بعد ما حسو بالقفا اللي خدوه
و مرة كان يوم عييد و انا خارج من الكنيسة مع اصحابي شفت الكموني .. قام طلع رشاشه و قتلني .. اللي ضايقني انه مابتسمليش زي كل اللي موتوني قبل كده :)
و تاني يوم في الكنيسة بلييل برضه .. راس السنة .. كنت محوش فلوس كتييير عشان اجيب إزازة نبيت و شوية جمبري و أعمل زي ما بييعملو في الأفلام اليوم ده :) .. و كنت بصلي و أقول يا رب تبقي السنة دي أحلي :) و رفعت عيني لصورة المسيح .. و فجأة سمعت صوت إنفجار .. كانت أخر اسمعها في حياتي :) .. قالولي بعد كده انهم لقو إيدي في عمارة في الدور السادس .. شوفت الناس و هي بتحاول تساعدني .. بس واضح اني كنت خلصت خالص :) .. و بصيت جمبي لقيت بنت صغيرة ميتة .. و بصيت شفت صورة المسيح الغرقانة دم .. و ماشفتش حاجة بعد كده لفترة كبييرة
فتحت عيني لقيتني في أمن الدولة .. كانو هيموتوني ضرب و تعذيب لحد ماعترف ان أنا اللي فجرت الكنيسة .. محدش سأل فيا .. لحد ما فعليا موتووني ضرب تعذييب :)
فتحت صفحتي عالفيسبوك .. و كتبت جملة صريحة .. لو بقينا 100 الف في الشارع محدش هيقدر يقف قصادنا :)
نزلت 25 يناير .. أول يوم عيني راحت من الغاز .. بعديها ب 3 ايام .. نزلت تاني .. بصيت فوق عمارة لقيت واحد بيبتسملي :) و بيهزر معايا بالليزر بتاعه و جابه علي قلبي .. و مت :) معرفش ده مين في واحد صاحبي قال ان ده من الداخلية و في واحد تاني قاللي ده بلاك ووتر .. بس هو عمل اللي عليه و ابتسملي :) .. خرجت في شارع بعديها أجري لقيت عساكر رفعتلهم ايدي .. ابتسمولي و مت :) و في اسكندرية وائل الكومي بصلي و قالي هو انتا ؟؟ و مت .. و في السويس كنت رايح احرق القسم .. و مت
و كنت قاعد في الميدان واحد بجمل داس عليا .. و مت :)
و اتضربت يوم 13 فبراير .. معرفش ليه .. و اتضربت 9 مارس .. و اتحبست 8 ابريل .. و امي نزلت تتكرم يوم 28 يونيه .. ظابط قذر قام اداها بالشلوط في بطنها .. مسكتش .. قامو موتوني تاني :)
كنت صايم في رمضان .. ضربوني و انا صايم :) بس كانو بيبتسمولي :)
و كنت بفطر مع مينا دانيال الصبح :) و نزلت معاه ماسبيرو بلييل .. ضحكلي ضحكة شرخت قلبي و إحنا تحت المدرعة :)
و كنت بعيط و انا ماسك ايد خطيبتي في المشرحة :)
و نزلت محمد محمود .. خدت البالطو بتاعي و قلت انزل اقف في المستشفي الميداني و اتحركت من الأزهر و رحت اعمل حاجة .. و موتوني مرتيين :)
و وانا واقف شفت الشناوي .. ابتسملي :) و طفي نوور عيني اللي حيلتي :)
و خلصت يومي و رحت جبت بيوميتي أدوية اديها للي في الميدان .. و مت :)
و كنت في السجن و هربت شريحة موبيل اتطمن علي أهلي .. بس عرفوا :) و حطولي خرطومين مياة بسافو .. واحد في بقي و التاني في ..... :) و مت :) قالولي ان معدتي إنفجرت :) بس شفت في ورقي في المشرحة كان مكتوب اني بلعت برشام :)
و كنت في اعتصام مجلس الوزرا .. و قلعوني هدومي :) و موتووني تاني :)
شفتوني في دخلة أهلاوي ثورجي ؟؟ طب حد سمعني و انا بقول سامع أم شهييد بتنادي .. كلاب العسكر قتلو ولادي ؟ :) و رحت بور سعييد :) .. لقيت الناس بتجري عليينا و هيموتونا .. حاولنا نجري بس البوابة كانت ملحومة :) طب حد سمعني و أنا بصرخ ؟؟ واحد مسكني حط شمروخين في جنبي :) و ضربني بالمطوة :) و رماني من فوق المدرج .. حتة كده بتاع ارتفاع 5 أدوار :) و نزل ورايا كتب علي ضهري بالمطوة بورسعيدي راجل :)
و كنت بدافع عن نفسي في منصور مت :)
و مرة قلت لأبويا ينزل معايا يجيب حقي قاللي أصل اكل العيش مر :) و سابني من غير مايجيب حقي .. و مت من القهر و العياط :)
و كتيير أوي من اصحابي زايدو عليا و أنا ميت .. قمت مت :)
ده غير الموتات اللي متها قبل كده و انا مش فاكرها :)
و زماني ميت من الحزن إني مش فاكرني :) او ميت و محدش عارفني :) بس بجد بتأسفلي :)
لو ضايقتك قبل كده ماتزعلش :) مفيش عتاب علي ميت :)
و أنا دلوقتي ميت لحين إشعار أخر :) أو اني الاقي موتة تانية :) أو ان جسمي يمووت :)
ليست هناك تعليقات:
إرسال تعليق